Finamiras ed incumbensas da la COHEP
L’incumbensa da las scolas autas da pedagogia consista da la scolaziun e da la furmaziun cuntinuada da magistras e magisters per tut ils stgalims da scola. Ellas èn d’auta qualitad e fundadas sin la scienza. La perscrutaziun, il svilup e la prestaziun da servetschs sustegnan questa incumbensa.
Cun la strategia 2012-2016, sancziunada da la radunanza da commembers dals 16/17 da november 2011, ha la COHEP formulà las suandantas perspectivas da svilup prioritaras:
- Terziarisaziun interna ed externa
La terziarisaziun externa da las premissas structuralas (qualificaziun dal persunal a las SAP, admissiun a la SAP, scolaziun, perscrutaziun, furmaziun cuntinuada) e la terziarisaziun interna da las furmas d’instruir e d’emprender e da la pratica da perscrutaziun e svilup èn adequatas a scolas autas e correspundan a l’incumbensa da las SAP. - Generaziun e transfer da savair
La generaziun da savair en il sectur da las didacticas dals roms, da las scienzas d’educaziun e da la pratica professiunala sco incumbensa essenziala da las scolas autas da pedagogia sustegna l’ulteriur svilup dal champ professiunal da la scolaziun da magistras e magisters. Ella resguarda las dumondas ed ils problems da la pratica da furmaziun e garantescha il transfer dal savair generà ord perscrutaziun e svilup en la pratica da furmaziun ed en la scolaziun e la furmaziun cuntinuada da magistras e magisters. - Evaluaziun da prestaziuns
L’effizienza e la qualitad da la scolaziun da magistras e magisters en il champ professiunal vegnan evaluadas regularmain e communitgadas da maniera transparenta. In monitoring da la COHEP per dumondas specificas è realisà. - Partenadis en il sistem da furmaziun
La COHEP e las scolas autas da pedagogia èn s’etablidas en il sistem da furmaziun tant sin nivel naziunal sco local sco partenaris relevants e cumpetents. Il maletg da las SAP en la publicitad è sa transfurmà da maniera positiva e persistenta grazia ad in engaschament augmentà per la pratica da furmaziun.